Прес конференција за регионална канцеларија за меѓународна соработка за западен Балкан
Француско-Германската канцеларија за млади и Агенцијата за млади и спорт одржаа прес конференција која се одржа во среда, 04.05.2016 г. во 11:15 ч. во просториите на Францускиот Институт Скопје за процесот на воспоставување на Регионалната канцеларија за младинска соработка за Западен Балкан.
На настанот свое обраќање имаа амбасадор на Германија - Христине Алтхаузер, Директорот на Агенцијата за млади и спорт - Марјан Спасески, Министерот за образование и наука – Пишар Луфтиу, Специјален претставник на Француско-Германската канцеларија за млади за ЈИЕ – Франк Моравиец.
Pегионалната канцеларија за младинска соработка на Западен Балкан е регионална иницијатива која има за цел формирање на меѓународна организација со промовирање на соработката и помирувањето меѓу младите во регионот на Западен Балкан.Овој процес беше фасилитиран од Француско-Германската канцеларија за млади.
Директорот на Агенцијата за млади и спорт, Марјан Спасески истакна дека со номинацијата на претставник во Регионалната работна група, Агенцијата за млади и спорт ја изрази својата поддршка на овој процес, но и ги вложи своите напори во креирањето на документите кои се резултат од овој повеќемесечен процес, а кои се однесуваат на мисијата, структурата, финансиите и активностите на оваа канцеларија.
Тој ја спомена и формираната работна група која вклучува преставници на институции, граѓански организации, средни училишта и високообразовни институции а чија цел беше со своето искуство и експертиза да овозможи помош и поддршка во процесот на формирање на Регионалната канцеларија за младинска соработка на регионално ниво.
Тој дополнително истакна дека оваа канцеларија ќе претставува институционален механизам за соработка која ќе се базира на принципите на мир, доверба, меѓусебно почитување, солидарност и толеранција и истата веруваме дека ќе придонесе за инклузивен пристап на младински размени и иновативни регионални проекти.
Младите луѓе се носители на промените, на позитивните промени во нашите општества и тие се оние кои со помош на оваа канцеларија ќе придонесат во крајна линија кон подобрување на односите и засилена соработка меѓу шесте држави.
