Свечено пуштено повеќенаменското игралиште во Реонски Центар, Општина Аеродром

 

Со изградбата на повеќенаменските игралишта, спортските сали, фудбалските игралишта и тениските терени низ целата држава, уште еднаш ја потврдуваме нашата заложба за градење на општество базирано на знаење и јакнење на духот и физичкото здравје кај младата популацијa. Ова денеска го истакна директорот на Агенцијата за млади и спорт Марјан Спасески кој заедно со министерката за култура Елизабета Канческа-Милевска и градоначалникот на Аеродром Ивица Конески го пушти во употреба повеќенаменското спортско игралиште во Основното училиште „Александар Македонски“ во општина Аеродром.
- Со активностите кои ги превземаме, ги поттикнуваме младите активно да се занимаваат со спорт и ги насочуваме кон вистинските вредности. Игралиштето кое денес го ставаме во функција е 28-то повеќенаменско игралиште. Низ целата држава 21 се завршени и подготвени за отворање, а уште пет игралишта се во фаза на градба и очекуваме во најскоро време да бидат целосно завршени, информира Спасески и додаде дека очекува на овие игралишта младите од ОУ "Александар Македонски" и од населбата Реонски Центар-Аеродром своето слободно време да го поминуваат тука.

Министерката Канческа-Милевска истакна дека инвестирајќи во спортот и спортската инфаструктура, ние инвестираме во вистинските вредности, во здрави генерации и силни индивидуи и додадед дека ова новоизградено игралиште, на кое младите ќе имаат можност да се дружат и да го поминуваат своето време, ќе има позитивни ефекти врз целокупниот развој, отргнувајќи ги младите од негативните појави од модернето време заврши во своето обраќање Канческа-Милевска.

Градоначалникот Конески појасни дека игралиштето е изградено според меѓународни стандарди, а вкупната негова површина со обиколната патека изнесува 1.300 метри квадратни. Игралиштето може да се користи за фудбал, серва, кошарка, ракомет, тенис.